මිනිස් සිරුරේ ඉන්ද්‍රියන් අතරින් අසිරිමත් එක් ඉන්ද්‍රියයක් ලෙස දෑස හදුන්වන්නට පුළුවන්.ලෝකය සුන්දරව දකින්නටත් ආලෝකය හදුනා ගැනීමටත් මිනිස් ශරීරයේ ඇති එකම ඉන්ද්‍රීය වන්නේ දෑස් ය.මිනිස් ඇසකට විවිධ වර්ණ මිලියන 10ක් පමණ වෙන් කර හදුනා ගැනීමට හැක.ඇස් පරීක්ෂාවක් සිදු කිරීම මගින් අපට වැලදෙන විවිධ රෝග විශාල සංඛ්‍යාවක් හදුනා ගැනීමේ හැකියාවකුත් පවතිනව.
ඇසට ඇති වන ඕනෑම රෝග තත්වයක් අප හදුන්වන්නේ ඇස් රෝග විදිහටයි.ඒ රෝග තත්වයන් අතරින් වැඩිම දෙනෙක් අන්ධ භාවයට පත් වෙන්නේ ඇසේ සුද ඇති වීමෙනුයි.නමුත් එය ප‍්‍රතිකාර ඔස්සේ යථා තත්වයට පත් කර ගැනීමට පුළුවන්.අන්ධ භාවය ඇති වීමට බලපාන දෙවන රෝග තත්වය වන්නේ ග්ලෝකෝමාවයි.මෙය සමාජයේ අවධානය අඩුවෙන් ලැබූ නමුත් අවදානම් රෝගයක් ලෙස නම් කරන්නට පුළුවන්.ඇසට ඇති විය හැකි භයානකම රෝගය ලෙස ග්ලෝකෝමා රෝගය හදුන්වන්නේ මින් නිට්ඨාවටම සුවය ලබන්නට නොහැකි නිසයි.ඇසේ දෘෂ්ටික ස්නායුව ක‍්‍රම ක‍්‍රමයෙන් හානි වී අන්ධ භාවයට පත් වීම මේ රෝගයේ ස්වභායයි. ග්ලෝකෝමා රෝගය අදෘශ්‍යමාන වූ රෝගයක් ලෙසත් හදුන්වන්නට පුළුවන්. අනෙකුත් රෝග මෙන් නොව ග්ලෝකෝමා රෝගය පූර්ව රෝග ලක්ෂණ මගින් හදුනා ගැනීමට ඇති නොහැකියාව මෙහි පවතින අදෘශ්‍යමාන බවයි.තවත් කරුණක් වන්නේ වෛද්‍යවරුන් වෙත යොමු වීමෙන් හෝ ස්වයං අධ්‍යයනයකින් තොරව ග්ලෝකෝමා රෝගය නොහැකි බව.
ග්ලෝකෝමා රෝග තත්වය වැලදීමේ අවදානමක් සහිත කොටස් කීපයක් හදුන්වන්නට පුළුවන්. සාමාන්‍යයෙන් මේ රෝගය වැලදෙන්නේ අවුරුදු 40 ඉක්මවූවන්ට යි. දෙමව්පියන්ට ග්ලෝකෝමා රෝගය පවතිනවා නම් එය දරුවන්ට වැලදීමේ අවදානම පස් ගුණයකි.සහෝදර සහෝදරියන්ට රෝගය පවතිනවා නම් ග්ලෝකෝමා වැලදීමේ අවදානම නව ගුණයකි.වයස අවුරුදු 60 ඉක්මවූවන්ටත් මෙය වැලදීමේ හැකියාවක් පවතී.එමෙන්ම පෙනීමේ දෝශ සදහා ඝණ උපැස් යුවල භාවිත කරන්නන්ටද ග්ලෝකෝමා අවදානම පවතිනවා.තවත් විශේෂ කරුණක් වන්නේ ඇස ආශ‍්‍රිත ප‍්‍රදේශයේ තැල්මක් වී ඇත්නම් එය පසු කාලීනව ග්ලෝකෝමා තත්වයක් බවට පත්වීමේ ඇති හැකියාවයි.ඇසේ පවතින දෘෂ්ටි ස්නායුවේ ලේ කැටියක් පවතින්නේ නම් එවැනි අයගෙන් 60%ක් පසු කලකදී ග්ලෝකෝමා අවදානමට පත් වන බව සොයා ගෙන ඇත.
මෙම රෝගය දීර්ඝ කාලයක් ඇසේ සිදු වන ක‍්‍රියාවලියක ප‍්‍රතිඵලයක් ලෙස හැදින්වීමට පුළුවන්.මෙහිදී සිදු වන්නේ ඇසේ පීඩනය වැඩි වීම නිසා දෘෂ්ටි ස්නායුව මත තෙරපුවක් ඇතිව ඊට ලේ ගමනාගමනය අඩු වී ස්නායු අක‍්‍රීය වීමයි.මිනිස් ඇසේ පවතින අම්ල තරලය ඇසෙන් පිටතට යාම සාමාන්‍ය ක‍්‍රියාවලියයි.නමුත් ග්ලෝකෝමා රෝගයේදී එම තරලය ඇසෙන් පිටතට ගමන් කරන ස්ථානය අවහිර වේ.ඒ හේතුවෙන් එම තරල ඇස තුළම එකතු වේ.එලෙස තරල ඇසෙන් පිටතට ගමන් කරන ස්ථාන අවහිර වීම සදහා ජානමය හේතු බලපායි.ඇස තුළ දිගින් දිගට එක් වන තරල හේතුවෙන් පීඩනයක් හට ගනී.ඉන් දෘෂ්ටි ස්නායුව මත තෙරපුමක් ඇති කර ඒ කරා පැමිණෙන ලේ ගමනාගමනය අඩු වේ.මේ අකාරයට ඇස ඇතුළත තරලයේ නිපදවීම් වැඩි වීම සහ පිටවීම අඩු වීම නිසා පෙනීමේ පරාසය ක‍්‍රමයෙන් හීන වේ.එහි අවසන් ප‍්‍රතිඵලය වන්නේ අන්ධභාවයට පත් වීමයි.
ග්ලෝකෝමාව මුල් අවස්ථාවේදී රෝග ලක්ෂණ නොපෙන්වන බැවින් කල් තියා හදුනා ගැනීමෙන් පෙනීම ආරක්ෂා කර ගන්නට පුළුවන්.ඒ සදහා රෝගය වැලදීමේ වැඩි හැකියාවක් පවතින වයස අවුරුදු 40 ඉක්මවූවන් වසරකට වරක්වත් අක්ෂි පරීක්ෂාවක් සිදු කළ යුතුයි.දියවැඩියා රෝගීන් සදහා කෙරෙන අක්ෂි පරීක්ෂාවන්හීදීත් ග්ලෝකෝමා අවදානම හදුනා ගැනීමට පුළුවන්.එමෙන්ම වයස අවුරුදු 40 ඉක්මවුවන් පෙනීමේ දුර්වලතා ම`ග හරවා ගැනීමට උපැස් යුවලක් භාවිත කරනවා.ඒ සදහා අක්ෂි පරීක්ෂාවන් සිදු කරන අවස්ථාවන්හීදීත් ග්ලෝකෝමා රෝගය වැලදීමේ ප‍්‍රවනතා හදුනා ගත හැකිය.ඇසෙහි දෘෂ්ටි ස්නායුවේ පරීක්ෂණයක් සිදු කිරීමෙන් මුල් අවස්ථාවේදීම ග්ලෝකෝමා රෝගය හදුනාගන්නට පුළුවන්.නමුත් එක් වසරක පරීක්ෂාවකින් සෑහීමට පත් නොවී දීර්ඝ කාලීනව පරීක්ෂණ සිදු කිරීම මගින් රෝග අවදානමෙන් මිදෙන්නට හැක.තවද එම පරීක්ෂණ ඇසුරින් තම ඇසේ ස්නායු තන්තු අඩු වේ දැයි හදුනා ගැනීමටත් තමාට ග්ලෝකෝමා අවදානමක් පවතින්නේදැයි නිශ්චය කර ගන්නටත් පුළුවන්.දෑස් අන්ධභාවයට පත් කරවන මේ රෝගය මුල් අවස්ථාවේදී හදුනා ගන්නට නොහැකි වුවොත් රෝගය උඩු දුවන විට උපකරණ භාවිතයෙන් රෝගය හදුනා ගන්නට පුළුවන්.නමුත් දෘෂ්ටි ස්නායුව 60%කට වඩා දුර්වල වූ පසු ප‍්‍රතිකාර සදහා පැමිණෙන රෝගීන් හදුන්වන්නේ ප‍්‍රමාදව පැමිනෙන්නන් ලෙසයි.
ග්ලෝකෝමා රෝගය සදහා පිළියම් ලෙස බිංදු බේත් ප‍්‍රතිකාරය සහ ශල්‍යකර්ම මේ වන විටත් ක‍්‍රියාත්මකය.බිංදු බේත් ප‍්‍රතිකාරය මගින් සිදු වන්නේ රෝගය යම් තරමකට පාලනයක්.එනම් ඇසේ පීඩනය පාලනය කර ඉන් දෘෂ්ටි ස්නායුවට ඇති වන අවදානම අවම කිරීමයි.ග්ලෝකෝමා රෝග තත්වය වැලදී ඇති පුද්ගලයෙක් වෛද්‍ය නිර්දේශය අනුව නියම කරන ලද ප‍්‍රතිකාර නොකඩවා ජීවිත කාලය පුරාවට ලබා ගත යුතුයි.යම් ග්ලෝකෝමා රෝගියෙක් ප‍්‍රතිකාර වෛද්‍ය නිර්දේශ නොතකා නතර කළ හොත් දෘෂ්ටි ස්නායුවේ තන්තු ඇති වන පීඩනය හේතුවෙන් අඩු වේ.සාමාන්‍යයෙන් මිනිස් ඇසක දෘෂ්ටි ස්නායුවේ තන්තු මිලියන 1.2ක් පවතී.එම ස්නායු තන්තු රැුක ගැනීමට අපොහොසත් වුවහොත් දෘෂ්ටි පරිපථය හීන වේ.ග්ලෝකෝමා රෝගයට බිංදු බේත් ප‍්‍රතිකාරයට අමතරව ශල්‍යකර්මද භාවිත කරයි.ඉන් සිදු වන්නේ ඇසේ අම්ල තරලය ඇසෙන් පිටතට ගමන් කිරීමට සිදුරක් සකස් කිරීමයි.නමුත් එම සිදුරේ ක‍්‍රියාකාරීත්වය විවිධ හේතු නිසා අඩපණ වන්නටත් පුළුවන්.එලෙෂ ශල්‍යකර්මයකට යොමු වූ රෝගියෙක් වුවද යළි යළිත් පරීක්ෂණ සදහා යොමු විය යුතුය.ඊට හේතු වන්නේ ග්ලෝකෝමා රෝගය ශල්‍යකර්ම මගින් 100% සුව කිරීමට ඇති නොහැකියාව යි.
ශ‍්‍රී ලංකාවේ සියලූම අක්ෂි සායන වල ග්ලෝකෝමා රෝගය තිබේදැයි පරීක්ෂා කරවා ගැනීමේ හා ප‍්‍රතිකාර ලබා ගැනීමට පුළුවන්.එම සායන වලට සහභාගි වීමෙන් රෝගය හදුනා ගැනීමටත් පාලනය කිරීමටත් හැකියාව ලැබේ.අක්ෂි සායනයක් වෙත යෙමු වීමේ දුෂ්කරතා පවතින්නේ නම් රජයේ සියලූ රෝහල් වලදී මීට අවැසි සියලූ ප‍්‍රතිකාර සහ ඖෂධ ලබාගැනීමට පුළුවන්.ජාතික අක්ෂි රෝහලේ බාහිර රෝගීන් සහ සාමාන්‍ය ජනතාව සදහා ග්ලෝකෝමා අක්ෂි පීඩන පරීක්ෂා කිරීමේ කුටියක් දැනටත් ක‍්‍රියාත්මකයි.එමෙන්ම ග්ලෝකෝමා රෝගය සදහාම විශේෂ ඒකක ජාතික අක්ෂි රෝහලේ සහ නුවර මහ රෝහලේ පිහිටුවීමට සූදානම්.සෞඛ්‍ය සේවා අධ්‍යක්ෂ ජෙනරාල් විශේෂඥ වෛද්‍ය පාලිත මහීපාල මහතා සදහන් කරන ආකාරයට 2016 වසරේ අක්ෂි සේවාව පුළුල් කිරීමට සහ එහි ගුණාත්මක බව වැඩි කිරීමට පියවර රැසක් ගෙන තිබේ.පශ්චාත් උපාධි වෛද්‍ය ආයතනය හා අක්ෂි වෛද්‍යවරුන්ගේ සංගමය විසින් අක්ෂි ශල්‍ය වෛදයවරුන් තව තවත් පුහුණු කරන්නට පියවර ගෙන ඇත.අක්ෂි ශල්‍ය වෛද්‍යවරුන්ගේ සංගමයේ සභාපතිනී විශේෂඥ වෛද්‍ය ප‍්‍රදීපා සිරිවර්ධන මහත්මිය සදහන් කරන අකාරයට එම සංගමය විසින් ග්ලෝකෝමා රෝගය පිළිබ`ද සාමාන්‍ය වෛද්‍යවරු, අක්ෂි තාක්ෂණවේදීන්, අක්ෂි ඒකක වෛද්‍යවරුන් සහ හෙදියන් දැනුවත් කිරීමේ වැඩමුළු පවත්වන බවයි.මේ සියල්ලේ එකම අරමුණ වන්නේ ග්ලෝකෝමා රෝගය පිළිබද දැනුවත් භාවය වැඩි කරලීම මගින් රෝගය මැඩපැවැත්විමයි.
